Zığ Abşeron yarımadasında Bakı buxtası sahilindədir. Yaşayış məntəqəsi kimi ilk dəfə 1547-ci ilə aid Şah l Təhmasibin fərmanında adı çəkilir. İlk sakinləri Suraxanıda olmuşdur. Qəsəbənin adı yaxınlığındakı Zığ gölünün adından götürülmüşdür. Bəzi tədqiqatçılar oykonimi Qafqazın şimal qərbində yaşamış Ziğlərin (Ziqlərin) adı ilə bağlayırlar.
Abşeron yarımadasının ən qədim yaşayış məskənlərindən biri də Şağandır. Arxeoloji qazıntıların nəticələrindən məlum olmuşdur ki, hələ e.ə.3000 il əvvəl bu ərazidə əhali məskunlaşmışdır. Qəsəbədə tunc dövrünə aid qayaüstü Günəş, Ay, təsərrüfat və məişət əşyalarının təsvirləri kəndin qədim yaşayış yeri olduğunu sübut edir.
Pirəkəşkül vaxtilə Abşeronun qədim kəndlərindən olub. Kənd uzun müddət Çaylı adını daşıyıb. Pirəkəşkül kəndinin adının mənşəyi çox qədimlərə gedib çıxır. Adın etimologiyası baradə fikirlər demək olar ki, şaxələnmir.
1856-cı ilin “Qafqaz təqvimi”ndə Maştağa bölməsinin Pirşəfiq (yerli dilin əlifbası ilə پيرشفيق) kəndinin adı çəkilir. B. V. Millerin 1920-ci illərin sonlarına aid əsərlərindən birində “Pir-Şaxı (Pirşağı kəndi, Bak. mahalı)” kəlməsinə rast gəlmək olar. Sovet dövrü ədəbiyyatında Pirşağı yazısı da var. Azərbaycan kiril əlifbasında ya Pirşağa, ya da Pirşağı kimi yazılıb.
Hövsan Bakı şəhəri Suraxanı rayonunun inzibati tabeliyindəki şəhər tipli qəsəbədir. Kənddə eyniadlı dəmir yolu stansiyası və liman var. Hövsan Abşeron yarımadasının cənub sahilində yerləşir. Şimal-şərqdə Binə, şərqdə isə Türkanla bitişikdir. Onun qərbində Zığ, şimal qərbində isə Suraxanı və Qaraçuxur yerləşir.
Balaxanı xalis tat kəndidir. Kəndin adı fars dilindəki iki sözdən əmələ gəlmişdir: Bala (yuxarı, hündür) və xana (ev). 1427-ci ildə burada vəzir Şirvanşah I İbrahimin oğlu Şakir ağanın məqbərəsi ucaldılmış, 1538-ci ildə Balaxanı Səfəvilərin hakimiyyəti altına düşmüşdür.
Suraxanı rayonu Abşeron yarımadasının ən qədim yaşayış məskənlərindən biridir. Rayonun yaşayış məntəqələri XIX əsrin sonlarında, Azərbaycanda neft hasilatının sürətlə inkişaf etməyə başladığı dövrdə inkişaf etmişdir.
Mərdəkan Abşeronun şimal-şərqində Xəzər sahillərində yerləşir və Bakının Xəzər rayonunun mərkəzi sayılır. Abşeronun ən qədim kəndlərindən biri olan Mərdəkan 1936-cı ildə qəsəbə statusu almışdır.
Binə ərazisinə görə Bakının Maştağadan sonra ən böyük ikinci qəsəbəsidir. Məskunlaşma baxımından Abşeronun ən cavan yaşayış məntəqələrindən biri sayılır.
Lökbatan şəhər tipli qəsəbə olaraq Qaradağ rayonunun mərkəzidir. Qəsəbə ərazisində xeyli palçıq vulkanı vardır. Bilinən tarixdə 18 güclü vulkan püskürməsi olmuşdur. Son dəfə vulkan oyanması 2001-ci ildə qeydə alınıb.
Fatmayı (yerli dilin əlifbası ilə فاطمۀ) Abşeron yarımadasının şimalında yerləşir. Şimaldan və şimal-şərqdən Görədil, cənubdan Mehdiabad, qərbdən Novxanı kəndi ilə qonşudur. Fatmayı 1806-cı ildə Rusiya imperiyasının tərkibinə daxil olan Bakı xanlığının tərkibində idi.
Əmircan adlanan kənd Abşeronun ən qədim kəndlərindən biridir. Yerli əhali bu kəndə Xilə deyir. Xilə toponiminə tək Abşeronda deyil Azərbaycanın bir çox başqa bölgələrində də rast gəlmək olur. Xilə adı İraqın Hillə bölgəsindən Azərbaycana köçən tayfa ilə bağlıdır.
