İmam Xamenei Oman sultanı Heysəm bin Tariqi qəbul edib + FOTO

Bu gün 29 may tarixində keçirilən görüşdə Ali Rəhbər İran və Oman arasındakı əlaqələri çoxillik və köklü adlandırıb və bildirib: “Biz iki ölkə arasında əlaqələrin bütün sahələrdə genişləndirilməsinin hər iki tərəf üçün faydalı olduğuna inanırıq”.

İmam Xamenei İran və Oman tərəfləri arasında aparılan danışıqlara toxunaraq qeyd edib: “Vacib olan odur ki, bu danışıqlar nəzərəçarpacaq nəticələrə çatana qədər ciddi şəkildə izlənilməli və sonda əlaqələr genişləndirilməlidir”.

Ali Rəhbər həmçinin sionist rejimin bölgədə mövcudluğunun təhlükəsinə toxunaraq əlavə edib: “Sionist rejim və onun havadarlarının siyasəti regionda ixtilaf yaratmaq və sülhün olmamasıdır, ona görə də bütün region ölkələri bu məsələyə diqqət yetirməlidir”.

Ali Rəhbər qeyd edib: “Oman və İran arasında əməkdaşlığın artırılması əhəmiyyət kəsb edir; çünki iki ölkə Hörmüz boğazının çox mühüm su yolunu paylaşır”.

İmam Xamenei Oman sultanının Misirin İran İslam Respublikası ilə əlaqələri bərpa etmək istəyilə bağlı açıqlamasına toxunaraq vurğulayıb: “Biz bu mövqeyi alqışlayırıq və bu baxımdan, heç bir problemimiz yoxdur”.

İmam Xamenei Oman sultanının İran və Səudiyyə Ərəbistanı arasında əlaqələrin bərpasından məmnun olması ilə bağlı açıqlamasına münasibətində bildirib: “Bu məsələlər prezident Rəisi hökumətinin qonşular və region ölkələri ilə əlaqələrin genişləndirilməsi və möhkəmləndirilməsi istiqamətində apardığı yaxşı siyasətin nəticəsidir”.

Ali Rəhbər müsəlman hökumətlər arasında əlaqələrin genişlənməsi ilə bağlı deyib: “İslam ümmətinin yenidən öz şöhrətini qazanacağına və İslam ölkələrinin imkanlarının bütün İslam xalqları, ölkələri və dövlətləri üçün faydalı olacağına ümid edirik”.