Qəzza və Fələstində hərbi vəziyyətlə bağlı son xəbərlər, 31 Oktyabr 2023

Fələstində döyüşlərin 25-ci günündə Qəzza zolağının bütün şimal xəttlərində fələstinli döyüşçülərlə İsrail qüvvələri arasında toqquşmalar davam edib. Bu gün səhər saatlarında İsrail işğalçı qüvvələri Əl-Təvam məhəlləsində irəliləmək məqsədi ilə Beyt Lahianın qərbində hücumlara başlayıb. Əl-Qəssam batalyonlarının verdiyi məlumata görə, müqavimət döyüşçüləri bu bölgədə İsrail ordusunun hücumlarını dəf edib və İsrailin 3 silahı da “Yasin” raketləri ilə hədəfə alınıb.

Beyt Hanun oxunda xətlərin vəziyyəti dəyişməyib və İsrail qüvvələri Beyt Hanunun şimalında Qəzzanın şimalında və Erez keçidi ətrafında sərhəd xətlərinə nəzarət edir.

Qəzza şəhərinin cənub oxunda və Cuhor Əd-Dik bölgəsində fələstinli döyüşçülərlə İsrail qüvvələri arasında ara-sıra toqquşmalar və döyüşlər davam edib. Dünən İsrailin bu cəbhədə irəliləyişlərindən sonra bu gün xüsusi irəliləyiş olmayıb. Görünən odur ki, İsrail ordusunun irəliləməsi hələlik Əl-Zeytun məhəlləsinin cənubunda dayanıb. Qəzza daxilindən verilən məlumata görə, bu gün Cuhor Əd-Dik bölgəsində gedən döyüşlər zamanı İsrail qüvvələri müqavimət qüvvələri tərəfindən pusquya salınıb və İsrail rejiminin iki tankı fələstinli döyüşçülər tərəfindən məhv edilib.

Həmçinin İsrail ordusunun etirafına əsasən, bu gün Qəzza zolağının şimalında İsrail ordusunun xüsusi təyinatlılarından iki üzvü öldürülüb.

Qəzza zolağının cənubundakı digər xətlər də demək olar ki, dinc gün keçirdi və Qəzza zolağının cənubunda xüsusi münaqişə müşahidə olunmadı.

İsrail rejiminin qırıcıları və artilleriyasının Qəzzanın müxtəlif bölgələrini bombalaması davam edir. Bu gün İsrail rejimi Qəzza zolağının şimalındakı Cəbəliya qaçqın düşərgəsinə vəhşicəsinə hücumu zamanı yüzlərlə dinc sakin, qadın və uşağı qətlə yetirib. İlkin məlumata görə, bu hücumda azı 400 nəfər şəhid olub və yaralanıb. Cəbəliya bölgəsi Qəzzada ən çox məskunlaşan məcburi köçkün düşərgəsidir.

Fələstin Səhiyyə Nazirliyi Qəzzada şəhidlərin sayının 8 min 485-i keçdiyini, yaralıların sayının isə 21 mindən çox olduğunu açıqlayıb. İordan çayının qərb sahilində ən azı 125 fələstinli şəhid olub, 2050-dən çox insan isə yaralanıb.

Şimal cəbhəsində Hizbullah ilə İsrail arasında artilleriya və raket atışmaları davam edib. Bu hücumların birində Hizbullah Əl-Duhirə bölgəsinin sərhədində Əl-Cərda yaxınlığında İsrail ordusunun piyada qüvvələrinin yerləşdiyi yerə hücum edib. Bu hücumda çoxlu sayda İsrail hərbçisinin öldüyü və ya yaralandığı bildirilir. Həmçinin sionist rejimin Merkava tankı Natuanın şərqindəki Branit bazası ətrafında idarə olunan raketlə hədəfə alınıb.

Bu gün digər mühüm hadisə də Yəmən ordusunun işğal altındakı Fələstinin cənubunda İsrail rejiminin mövqelərinə raket və pilotsuz təyyarə ilə hücumu olub. Bu gün səhər saatlarında İsrail mediası işğal olunmuş Fələstinin cənubu yaxınlığında və Eylat bölgəsində bir neçə raket təyyarəsinin İsrailin hava hücumundan müdafiə sistemləri və həmçinin bu rejimin qırıcıları tərəfindən tutularaq məhv edilməsi barədə məlumat yayıb. Bir neçə saat sonra Yəmən silahlı qüvvələrinin sözçüsü Yəhya əs-Səri video bəyanatında işğal olunmuş ərazilərə raket və pilotsuz təyyarələrin hücumlarına görə məsuliyyəti öz üzərinə götürüb. Yəhya əs-Sərinin sözlərinə görə, bugünkü hücum Yəmən ordusunun son günlər İsrail rejiminə qarşı raket və pilotsuz təyyarə hücumlarının üçüncü mərhələsi olub. Bu şəkildə və bu bəyanatın dərci ilə Yəmən ordusu və xalq komitələri rəsmi olaraq İsrail rejimi ilə müharibəyə girdilər.

Daha ətraflı: Qəzzada və Fələstinin şimalında hərbi vəziyyətlə bağlı son xəbərlər, 30 Oktyabr 2023