İŞİD lideri öldürüldü, sözçüsü həbs olundu!

“İslam Dünyası Xəbərləri” informasiya agentliyi saytının məlumatına görə, avqustun 3-də İŞİD terror qruplaşmasının mediası İŞİD-in yeni sözçüsü Əbu Huzeyfə Əl-Ənsaridən “Fəstəbşiru Bi Bəyukumulləzi Bayətum Bihi” başlıqlı səs mesajı yayımlayaraq, İŞİD-in keçmiş lideri “Əbul Hüseyn Əl-Hüseyni Əl-Qurəşi”nin ölümünü və “Əbu Həfs Əl-Haşimi Əl-Qurəşi”nin yeni lider təyin olunduğunu bildirib.

Bu audio mesajda keçmiş İŞİD liderinin ölüm tarixi və yeri kimi təfərrüatlar qeyd edilmir. İŞİD-in yeni sözçüsünün səsli mesajına görə, bu terror qruplaşmasının keçmiş sözçüsü Əbu Ömər Əl-Mühacir Türkiyə Kəşfiyyat Təşkilatı tərəfindən həbs edilib.

Xatırladaq ki, Türkiyə prezidenti Rəcəb Tayyib Ərdoğan 2023-cü il aprelin 30-da televiziyaya verdiyi müsahibədə Türkiyə kəşfiyyatının İŞİD terror qruplaşmasının keçmiş lideri Əbul Hüseyn Əl-Qurəşini uzun müddət təqib etdikdən sonra nəhayət, aprelin 29-da Suriyadakı keçirilən əməliyyatda öldürdüklərini iddia etmişdi. Bu müsahibədən sonra Suriya Demokratik Qüvvələrinin (SDQ) media mərkəzinin rəhbəri Fərhad Şami öz Twitter səhifəsində İŞİD-in keçmiş lideri Əbul Hüseyn Əl-Hüseyni Əl-Qurəşinin Suriyanın Hələb əyalətində yerləşən Cendris məntəqəsində Əhrar Əl-Şərqiyyə terrorçularına bağlı hərbi mərkəzdə öldürüldüyünü açıqlamışdır.

Həmçinin, 2022-ci il noyabrın 30-da İŞİD terror qruplaşmasına yaxın media İŞİD-in keçmiş sözçüsü Əbu Ömər Əl-Mühacirə istinadən Əbul Həsən Əl-Haşimi Əl-Qürəşinin ölümü və Əbul Hüseyn Əl-Hüseyni Əl-Qurəşinin yeni rəhbər təyin edilməsi barədə məlumat yaymışdır.