Deyr əz-Zor əyalətində Suriya qəbilələri ilə SDQ qüvvələri arasında toqquşmalar yenidən başlayıb

“İslam Dünyası Xəbərləri” informasiya agentliyi saytının məlumatına görə, Əl-Əkidat qəbiləsinin şeyxi İbrahim Əl-Hafil səs faylı yayımlayaraq Suriya Demokratik Qüvvələrinin (SDQ) Deyr əz-Zor əyalətindəki mövqelərinə hücum əmri verib.

Əl-Hafilin əmrinin verilməsindən sonra Diban şəhərində Suriya qəbilələri ilə SDQ qüvvələri arasında şiddətli silahlı toqquşmalar baş verib. Əl-Həvayic və Əl-Təyyanə bölgələrində də toqquşmaların olduğu bildirilir.

Yerli mənbələr qarşıdurmaların şiddətləndiyi bir vaxtda SDQ qüvvələrinin Əl-Həvaic bölgəsindəki mövqelərindən geri çəkildiyini iddia edib. Əl-Təyyanə bölgəsində suriyalı qəbilələrlə toqquşmada Suriya Demokratik Qüvvələrinin 5 üzvü həlak olub.

Qeyd edək ki, avqust ayında Deyr-əz-Zor əyalətinin müxtəlif bölgələri Suriya qəbilələri ilə Suriya Demokratik Qüvvələri arasında silahlı qarşıdurmanın şahidi olub. Suriya Demokratik Qüvvələrinin (SDQ) Deyr əz-Zor əyalətinin münaqişə bölgələrinə nəzarəti ələ keçirməsindən və Amerika koalisiyasının vasitəçiliyindən bir neçə gün sonra tərəflər arasında qarşıdurma bitdiyi bir vaxtda bu toqquşmalar yenidən başlayıb.