İordan çayının qərb sahilindəki hərbi münaqişələrdən ən son xəbərlər, 26 Yanvar 2023

Bu gün səhər 26 yanvar tarixində Sionist rejim ordusu xüsusi təyinatlı qüvvələri süd məhsulları daşıyan yük maşını ilə İordan çayının qərb sahilinin şimalındakı Cenin düşərgəsinə daxil oldular. Sionist qüvvələrin Fələstin müqavimət qüvvələri tərəfindən tanınmasından sonra şiddətli qarşıdurma başladı.

Qarşıdurmaların başlamasından sonra İsrail hərbçiləri yaralı fələstinlilərə kömək etmək üçün tibb işçilərinin Ceninə girməsinə mane olduqları bəs deyilmiş kimi, bu düşərgəyə yardımçı hərbi qüvvələr də çağırıblar.

İsrail ordusunun yardımçı qüvvələrinin düşərgəyə daxil olmaları ilə, sionist əsgərlər Cenin düşərgəsində elektrik enerjisini kəsib və bu bölgədəki bəzi evlərin damına snayperlər yerləşdirərək fələstinlilərə atəş açıblar. Bu hərəkətə cavab olaraq Fələstin müqavimət qüvvələri bir neçə İsrail snayperinin olduğu yerləri atəşə tutub. Həmçinin Cenin düşərgəsi üzərində Fələstin müqavimət qüvvələri tərəfindən İsrail ordusuna məxsus kvadrokopter vurulub.

Sionist rejim ordusu düşərgədə etdiyi bütün cinayətlərə kifasyətlənməyərək, Cenin dövlət xəstəxanasına soxulub və qözyaşardıcı qazlardan istifadə edib. Hadisə nəticəsində qadınlar və körpə uşaqlar zərər çəkdilər.

Fələstin Qızıl Aypara Cəmiyyətinin məlumatına görə, İsrail əsgərləri tərəfindən 9 fələstinli şəhid olub, 20-dən çoxu isə ağır yaralanıb. Toqquşmaların intensivliyi səbəbindən şəhid və yaralıların sayının artma ehtimalı var.

Qeyd edək ki, sionist ordusunun Ceninə ağır hücumundan sonra Qəzzada Fələstin müqavimət dəstələri fövqəladə toplantı keçirməyi planlaşdırdılar. Bununla əlaqədar olaraq, İsrail mediası sionist ordusunun Qəzzədəki Fələstin müqavimət dəstələrinin bugünkü Cenin hadisələrinə ehtimal olunan cavabından ehtiyat edərək, hazır vəziyyətə gətirildiyini və cənub sərhədlərində Dəmir Qübbə HHM sistemlərini işə saldığını elan edib.

Sionistlərin Ceninə hücumunun başlamasından bir neçə saat sonra İsrail ordusu bir bəyanat yayaraq bildirib:

“Xüsusi polis bölməsi, Şabak və İsrail ordusunun birgə əməliyyatı nəticəsində Cenin düşərgəsinin mərkəzində İslami Cihad hərəkatının hərbi qolunun 3 komandiri öldürülüb”.

İsrail mediasının məlumatına görə, İsrail ordusu Fələstin müqavimət dəstələrinin cavab hücumlarından qorxaraq işğal olunmuş Fələstinin cənub bölgələrində Dəmir Qübbə sistemlərinin sayını artırmaq planını nəzərdən keçirir.